చూపు

......................

నీడల్లోకి ఆకుల్ని పంపుతోంది
తన రూపం వెదుక్కుంటూ చెట్టు

మర్రిమాను తననుతాను
బెరడ్లుగా రాల్చుకుంటోంది తన గతంలోకి

పారుతున్న నీళ్ళు
ఎంతకీ తమనుతాము పట్టుకోలేక విలపిస్తున్నట్టుగా
ఆ వాగునీళ్ళ చప్పుడు

వొంటరిగా ఎటోచూస్తూ తనకూ ప్రపంచానికి మధ్య
సందేశాల్ని బట్వాడా చేస్తున్నట్టు
మధ్య మధ్యలో మట్టల్ని కదిలిస్తుంది తాటిచెట్టు

ఊరంతా నిశ్శబ్దం ఆవులు,మేకలు,బర్రెలు
ఆ డొంకను దాటిపోయాక ;
కీచురాళ్ళే నయం మాటల్ని కోల్పోయిన మనుషులకంటే

మిగిలింది ;మిగుల్చుకోవాల్సింది ;ఎదురుచూడాల్సింది
ఇంకేం కనిపించడం లేదేమిటీ
ఈ మాగిన మరిగిన కంటికి,ఆ చిన్నప్పటి లేలేత కళ్ళకు కనిపించినట్లు

30.11.2013