ఒక కవాతు

.........................................

రోడ్లపై కదిలిన ప్రతి అడుగూ ఒక ఆకాంక్ష
నెత్తురోడిన ప్రతి దేహం ఒక ఆకాంక్ష
జెండాలై రెపరెపలాడిన ప్రతి నినాదమూ ఒక ఆకాంక్ష !

ఖైరతాబాదు ఫ్లైఓవర్ దారిలో
ముళ్ళకంచెలమీద గీరుకుని ఒలికిన రక్తం
లిఖించిన ఆకాంక్ష 'తెలంగాణా' !
తలలుపగిలినా మునుముందుకే కదిలిన ప్రతి అడుగులో
చెదరని సంకల్పపు ఆకాంక్ష 'తెలంగాణా'!
వానలో తడిసి,వణికిన ప్రతి క్షణంలో
లోలోపల ఎగిసిన శబ్దమూ 'తెలంగాణా'!
ఉస్మానియా యూనివర్సిటీ గేటుముందు
కదిలి,కరిగి,ఉరకలెత్తిన రణన్నినాదమూ'తెలంగాణా'!

ఒంటిమీద పడి,కమిలిన ప్రతిదెబ్బా
తెలంగాణా పౌరసత్వపుగుర్తింపుచిహ్నం!

తెలంగాణా కేవలం ఒక ప్రాంతం మాత్రమే కాదు
అది ఇప్పుడొక మార్పుకేతనం; ఒకానొక పునర్మూల్యాంకనం;భవిష్యత్తును కలగంటున్న పక్షిచూపు;రేపటి లేలేతస్వప్నాల్ని నినదిస్తున్నఉక్కుగొంతు !

ఇవాళ సాగరహారం
ఆకాంక్షను రూపంగా కళ్ళకు కట్టింది
సమూహమై ఉరకలెత్తింది
సంభాషణగా ముందుకు వచ్హింది
దయగా హక్కుల్ని అడిగింది,అలాయిబలాయి కోసం చేతులు చాచింది
'తెలంగాణ మా జన్మహక్కు'అంది, మా అన్నంముద్ద మాదే అంది
హక్కులవివక్షను ప్రశ్నించింది

ఆకాంక్షలను ఇంకా ఇంకా అవహేళన చేస్తారా?!

ఇకపై
గడిచే తాత్సారపు ప్రతి ఘడియ
ఆకాంక్ష- అగ్నిగా ఉబికి చిమ్మబోయే లావా!

*3.10.2012