ఈ రాత్రిని కొలవాలి

------------

ఈ రాత్రిని కొలవాలి

ముసురుపట్టిన  ఈ రాత్రిలో

ఇంకిన వర్షపుచినుకుల్లో తడిచి వణుకుతున్న

రాత్రిదేహాన్ని కొలవాలి.

1

దుఃఖపుజీర అంటిన కాలపుచెక్కిలి మీద

స్ఫోటకం మచ్చలా నిద్రిస్తున్న రాత్రి;

పగలంతా అలిసి ,ఇల్లంతా తిరిగి తిరిగి విసిరేయబడ్డ

మసిగుడ్డలాంటి రాత్రి;

2

=మరలాంటి రాత్రి ,కాలి ఆరిపోయిన కొరకాసులాంటి రాత్రి=

కొలవగా కొలవగా మిగిలిపొయిన రాత్రిని

కల లో ప లి ర హా స్యా ల లోంచి  కొలవాలి .

ఆత్మకథ

 
ఉగ్గంపల్లి పీరీల కొట్టం,జయ్యారం ఏటిపాట,చినగూడురు గడీల మగ్గిన బతుకులు,
సాయిబులో దూదేకులో తేడాతెలియని అమాయక జ్ఞానం,మాట్లాడితే పీరీలు ఊరేగిన గాధలు,అర్ధరూపాయికోసం ఆరుమైళ్ళు నడిచిన సిత్రాలు,బండమీద తాటిదూలాలతో కట్టుకున్న ఒంటిదూలం గుడిసె కతలు,పొవ్వాకు చుట్టను చుట్టుకునే నేర్పులు,గుక్కతిప్పుకోకుండా ఊపిరితీసుకోకుండా బీడీలు తాగిన వైనాలు,ఐదుగురన్నదమ్ముల ఆరాటాలు,అందరి పొత్తునా పుట్టిన 'అక్కమ్మ 'లాంటి అక్క;
అక్కకోసం అమ్మపంపిన గోష్కీ సాలన్`బుత్తీలు,మీఅమ్మకోసం నువ్వు కొనుక్కొచ్చిన చీరల కధలు,మానుకోటనుండి బెజవాడదాకా రైలుకట్టమీద నడుచుకుంటూ కూలీ కోసం తరలిపోయినకష్టాలు

నాయినా!ఇదంతా నీ కన్నీటి వ్యధ!

మామ్మతో నీ నిఖాముచ్చట్లు,మాతాత కరీంసాబు గొడ్లుకోసి పోగులుపంచిన దృష్టాంతాలు,కావిడి చేతుల కాకలు తీరిన నీ ముచ్చట్లు;ముత్రాసి గూడెం,రేగుల గూడెం,పూసమోళ్ళ గుంపు,అనంతారం 'ఓ సాయిబూ ' అని పిలుచుకున్న దగ్గరితనాలు,వడితిరిగిపోయిన నీ పిక్కల నరాలు,తట్ట మోసిమోసి బోడిగుండైన నీ వంకీల జుట్టు

అబ్బ! ఇదంతా నీ జీవిత గాధ!

ఇరవైగుంటల పొలంలో బంగారం పండించిన వైనాలు,ఏట పెట్టడాలు,ఎగసాయం చేయడాలు,మోట కొట్టడాలు,మోపులెత్తడాలూ,కాసెపోసి పంచెకట్టడాలు,ఎలుగుకట్టడాలు,గిత్త ఒట్టకొట్టడాలు,తాడుపేనడాలు,చిక్కం వేయడాలు,గుమ్మి కట్టడాలు,ఇటుకబట్టి కాల్చడాలు,మునుం పట్టడాలు,రుణంతీర్చుకోవడాలు,పందిరేయడాలు,పగ్గమేయడాలూ

అబ్బా!ఇదంతా నావారసత్వపు కధ!

ఒక సంభాషణ ముగిశాక,మరో సంభాషణ

****

నువ్వెప్పుడైనా నీ సంభాషణలో నువ్వే పరాయిగా మిగలడం
ఆ పిదప
నీ మాటల్లోనే నువ్వు మునిగితేలుతుండటం
గమనించావా?

లేక, నువ్వే నీవి కాని మాటలతో
అప్పటిదాకా గడపటం-అలానే ఇంకా గడిపేస్తుండటం
గమనించావా?

నిన్నటిదాకా నీకు నువ్వే వేసుకున్న దారుల్లో
నీ అడుగుల్నినువ్వే లెక్కించుకుంటూ
ఆ దారుల్లోనే మళ్ళీ మళ్ళీ
నడుస్తూ తడుస్తూ ఆ సంగతులే పదేపదే చెపుతూ
అక్కడే మిగిలిపోయావని గమనించావా?

మనుషుల్నిముడిసరుకులుగా మార్చే
వ్యాపార సంస్క్రుతి లోకి,అంకెలుగా మార్చే వ్యూహాల్లోకి
నువ్వూ, నీ అక్షరమూ చేరిపోతున్నాయని
గమనించావా?

గమనించీ ఎవరూ గమనించడం లేదనే
ధైర్యంతో అలా
ఉండిపోయావా?!

ఒక్కొక్కరోజు-6

ఇప్పుడు నేను మౌనాన్ని
నా నిజమైన వ్యక్తీకరణగా నిర్మించుకున్నాను
నిశ్శబ్దాన్ని నాలోపలి అస్త్రంగా మార్చుకున్నాను

కొన్నేళ్ళనుంచి నాపాదాల కింద నలిగిపోయిన
నేలకు క్షమాపణలు చెప్పి
పాదాక్రాన్తుడిని అవుతున్నాను.
తెరలు తెరలుగా నవ్వే నవ్వుపై
నల్లటి నిషేధపు రంగుల్ని పూస్తున్నాను.

కనపడినంతమేరా
కలిసిమెలిసి తిరిగిన నా ఉత్సాహాన్ని
కుదించు కుంటున్నాను.

కొన్ని మాటలు ,చాలా కొన్ని నవ్వులు
నిర్భయ సందర్భాలు -
లోజేబులో దాచుకుని ఎప్పటికైనా
వాటి అవసరముంటుందని ఎదురు చూస్తాను

రాత్రుల ముందు సాగిలపడి
కొన్ని కలలముందు కూచున్నాను
మంతనాలు సాగుతూనే ఉన్నాయి.
అవి వివరించే ఎన్నో విషయాలను వింటూ
=ఇంకా తేల్చుకోవాల్సినవేవో ,మాన్పుకోవాల్సినవేవో
లోపలి నించి బయటికి తీసి
చూసుకుంటున్నాను.

ఒక్కొక్కరోజు-5

**********

అదేమిటో
సంవత్సరాల తరబడి యేర్చికూర్చినవన్నీ
ఒక్క క్చణంలో
కూలిపోతాయి,కనుమరుగయిపోతాయి.

లోపల తాళంవేసి దాచుకున్న
అపురూపమైనవన్నీ మళ్ళీ ఒకసారి
తిరిగి చూసుకుందామనుకునేసరికి
మాయమౌతాయి.

మాట్లాడే మాటలకు
యెవరికి వారు వేరే అర్ధాలను
పేర్చుకుంటుంటారు.
అప్పటివరకూ వెంట నడిచిన నీడ
ఎంత వెతికినా దరిదాపుల్లో కనిపించదు.
వేళ్ళసందుల్లో దాచుకున్న అక్శరాలు
తెల్లటి కాగితమ్మీద కూచోడానికి
సుతరామూ ఇష్టపడవు.

పొద్దున్నే లేవగానే
నా ముఖం నన్నేకోల్పోయి
మరో కొత్త ముఖంగా అద్దం ముందు
నన్ను నాకే పరిచయం చేస్తుంటుంది
= అదేమిటో...!!

ఒక్కొక్కరోజు-4

**********

లోపలి గదిలోంచి
ఏదైనా చూద్దామని ప్రయత్నిస్తుంటాను..

నిరామయంగా గోడలు,
వాటిపై అప్పుడెప్పుడో తగిలించిన
కొన్ని బొమ్మలు,
అప్పటి మానసికస్తితిలోని బోధపడిన దాని అర్ధాలు;
ఇప్పుడు మారిన ఆ అర్ధాలు-

మధ్యమధ్యన నాలాగే
ఏమీతోచక మనసును అటూఇటూ తిప్పే నాలాగే
ఇల్లంతా మూలమూలకు తిరిగి
ఇంకేం చేయాలో తోచక తోకూపుతూ నావైపే
తదేకంగా చూసే కుక్క 'టామీ'-
***
ఏదో ఫోను మోత పలకరిస్తుంది.
ఎవరో గేటు తడుతున్నట్టు చప్పుడవుతుంది.
ఏదో బిల్లు కోసం పిలుస్తుంటారు.
ఎవరో పలకరింపు కోసం ఇంత ఎండని మోస్తూ
గడప దగ్గర చెమటచుక్కలై మెరుస్తుంటారు.
***
నిరామయపు గోడలు
జీవనాసక్తితో తళతళలాడటం మొదలవుతుంది..
'టామీ' అద్భుత ప్రపంచపు రాయబారిగా
నాచెంతనే ఉన్నట్లు ధైర్యంగా
సుతారంగా తోక ఊపుతుంది.

తగిలించిన బొమ్మలు
చిరునవ్వుల సారాన్ని నాలోకి
ఒంపుతూ, నావైపే తదేకంగా చూస్తూ
నాకో
సరికొత్త రోజుని బహుమతిగా అందిస్తుంటాయి.

ఒక్కొక్కరోజు-3

నిన్ననే ఒక మాట వినగలిగాను.
మొక్కచెప్పే మాటకోసం ఎదురుచూస్తున్నాను' అని
కదా అన్నాను.

విన్నాను ఒకమాట.!

దానిమాట విన్నాక
కొంచెం కుదుటపడ్డాను.

చేతుల్లా చాచిన దాని రెమ్మల నడుమ
లేత చిరునవ్వులాంటి మొగ్గ.
అపుడపుడే దాని లేలేత పెదవులపై మొలిచిన
మొగ్గలాంటి మాట.
అది పెదవి విప్పింది.
దాని మాటల్లో సుగంధం.
రేపటిపై అది నమ్ముతున్ననమ్మకం లాంటి
సుగంధం!!

ఆ సుగంధంలాంటి మాటను
చెవియొగ్గి విన్నాను.

భరోసాతో కూడిన ఆ మాటను
అనువదించుకున్నాను.

వర్తమానంలోంచి దాని మాటను
నా అనుభవసారంగా గ్రహించాను.
మాటలకు బతుకుసుగంధం అద్దాల్సిన
అవసరాన్ని గుర్తించాను.

ఇక బోలుమాటల అవసరమే అక్కర్లేదు.
బతుకుసుగంధపు మాటలే మనమధ్య..!!!

ఒక్కొక్కరోజు-2

 పీలగా వినిపించే గొంతు.

మొక్క నాతో మాట్లాడ్డం మొదలుపెట్టకమునుపే
దాని గొంతుకు అడ్డంపడుతున్నదేదో
సంశయం..

తలకు కుట్లుకుట్టుకుని
అరువుతెచ్హుకున్న జీవితమంత సంశయం.
చివరినిమిషంలో నిర్ణయం మార్చుకుని
మళ్ళీ మొదలుపెట్టిన జీవితంలాంటి సంశయం.

లోపల దాక్కుని
అసలు రూపం కన్పించకుండా
బయటికి మాత్రం కన్పించే
"అసలు మనమే కాని మనం"లాంటి సంశయం.
*
చెవులు దాని మాటల కోసం
నిరీక్శిస్తున్నాయి.
యుగాలుగా వినవలిసినవేవో మాటల కోసం
వేచిచూస్తున్నాయి.
మనకే తెలియని మనల్ని
మళ్ళీ ఎవరైనా చెపితే బాగుండు'నన్నట్లు
మనముందు మనల్ని నిలబెట్టి చూపితే
చూసుకోవాలని తాపత్రయం పడ్డట్లు
ఆసక్తిగా ఎదురుచూస్తున్నాయి..

వినాలి.
వినడం కోసం నేనిలా ఇక్కడ
వేచివున్నాను.

ఒక్కొక్కరోజు

ఒక్కొక్కరోజూ
ఒక అనుభవం..

ఒక గాయమో, చిగిరిస్తున్నరాగమో
లేత పలకరింపులకు మోరలెత్తే ఆనందమో
కానైతే యేదో ఒక అనుభవం.

అప్పటివరకూ చిరునవ్వుగా సమీపించే కాలం
హటాత్తుగా ఉరుముతుంది,నిట్టనిలువుగా చీలుస్తుంది.
*
పొద్దున్నే పలకరించే
పెరటిమొక్క ముఖంలోకి తరచి చూస్తున్నాను.
ఏదో చెప్పేందుకు
నా చెవి దగ్గరికి జరుగుతోంది.
వినాలి.
విన్నాక మీతో చెపుతాను.
అప్పటివరకు సెలవు....!!