ఇంకొంత మిగిలిన సందేహం

మిగిలింది నేనే ఇలా 

ఇంట్లో వేలాడకట్టిన గంటల్లోంచి

ఫ్యాన్ గాలికి విన్పించే సన్నని శబ్దంలా 

నేనే ఇలా 

వర్షంలోంచి తప్పించుకుని 

తల దాచుకునేందుకు ఏదో ఒక చోటు వెదుక్కుంటూ 

పరుగులు పెడుతున్న దూడలా 

నేనే ఇలా

ఓ చిరునవ్వుకు, ఓ ఆప్యాయతకు 

ఇంకొంచెం ప్రేమకు వెదుకులాడుతున్న మనిషిలా 

నేనే ఇలా 

నేను మలినం అంటని మాటల్ని  ప్రేమించాను 

మలినం నన్ను  ద్వేషించింది-

ప్రేమను ప్రేమతో ప్రేమించాను

అదేమో మాటల్ని ప్రేమించింది 

లోపలంతా నిజమైన మట్టిని నింపి 

సారవంతం అని నమ్మాను 

తీరా కొన్నాళ్ళకు అది కుళ్ళిపోయి 

నాకున్న నమ్మకమే అబద్దమని తేల్చింది.

చివరకు 

మిగిలింది నేనే ఇలా

***

(''లిఖిత'' 'శ్రీకాంత్ కు ప్రేమతో...)