దండం ,ప్రణామం ,సలాం !

అన్నీ తెలిసి తెలియనట్లుండే నీకు, 
అన్నీ చదివి చదవనట్లుండే ,చూసినా చూడనట్లుండే నీ తెలివికి 
సలాం

గుర్తుపట్టినా గుర్తుపట్టనట్లు; పలకరించినా గుర్తురానట్లు ,
ఎరిగినా ఎరగనట్లు మరీ చెప్పించుకుని,రప్పించుకుని,
అపుడపుడూ తప్పించుకుని మొత్తానికి నిన్ను నువ్వే
ప్రత్యేకంగా ప్రతిష్టించుకునే నిపుణతకు
ప్రణామం.

చదివితే అబ్బే వినయం; చదవగా వొచ్చే పరిణతి;
చదవగా చదవగా కన్పించే ఒకానొక విజ్డం,ఉదాత్తత
ఇవేవీ దరికే రానీక జాగ్రత్తలెన్నోపడి చిట్టచివరికిలా
రాజదండపు కొసన వేలాడే
మంత్రదండంలా మారిపోయినందుకు
దండం.

అక్కరకు రాని చుట్టంలాంటి అక్షరాలను
డబ్బాలో వేసుకుని డబాడబా మోగిస్తూ
నిశ్శబ్దం కోసం మాటల్నినిద్రామాత్రలుగా మార్చి
అక్షరాలా ప్రయోగిస్తున్నందుకు
ప్రణామం.

****
నాకనిపిస్తుంది, పేపర్ మీది నాలుగు రాతల్తో కరపత్రంగా
మిగలడం తప్ప,నిజంగా హృదయంతో కరచాలనం చేయడం
నీకేనాటికైనా అనుభవంలోకి వస్తుందా అని?!


6.10.2013