దిల్ షుక్ నగర్ ఇప్పుడు
బాంబుల మధ్య వణుకుతున్న
బెదురు బెదురు చూపుల లేగదూడ
కొన్ని మిర్చీబజ్జీలు,వేడి వేడి పునుగులు,కొన్ని సమోసాలు, కొంచెం చాయ్,
కూడా మరణించాక
విసిగి వేసారిన సాయంత్రాలని గడపడానికి
ఏ దిక్కూతోచక బిత్తర చూపుల బాటసారి
మరణం కొసన వేలాడుతూ
విరిగిన ఎముకల మధ్యన తీసుకుంటున్న చివరి శ్వాస
*
ఇదొక
ఆస్తమా పేషెంటులా బతుక్కోసం ఇన్హేలర్ వెతుక్కుంటున్న
రేపటి ప్రశ్నార్ధకం .
రోజూ వచ్చీపోయే దారిలో తుమ్మముళ్ళను చల్లినట్లు ,
తినాల్సిన అన్నంలో ఇసుకనెవరో పోసినట్లు
ఇక్కడెవరో జీవితంలోకి బతుకుభయాన్ని,
కొన్నిశవాలను ,మరికొన్నిగాయాలను చల్ల్లిపోయారు.
దిల్ షుక్ నగర్
ఇప్పుడొక బతుకువిధ్వంసాన్ని
కూర్చి పేర్చిన ప్రతీకల కూడలి !
23.2.2013
No comments:
Post a Comment