..............................
ఉన్నావా సరిగ్గా ఆ చిన్నప్పటి ముఖంతో
రాత్రుళ్ళలో రెప్పలవెనుక దాచుకున్న కళ్ళలోకి
వొంపుకున్నావా నిజంగా నిన్ను
నిజమైన కలలాగా
ఆ ముఖంగానే వున్నావా
ముఖం వెనుక మరో ముఖంగా ; మరిన్ని ముఖాలుగా
తచ్చాడుతూ తచ్చాడుతూ
ఆ చిన్నప్పటి ముఖంలోంచి తప్పిపోయి అసలు ఏ ముఖమో తెలియనంతగా
నిన్ను నువ్వే గుర్తుపట్టలేనంతగా
మిగిలిపోయావా
చీకటి కరుస్తుంది ; వెలుగూ కరుస్తుంది
జీవితం సరేసరి
కరుస్తూనే వుంటుంది
రోజుల్లోంచి నెలల్లోకి నెలల్లోంచి
సంవత్సరాల్లోకి తప్పిపోతూ పోతూ చివరికెక్కడో
వో వొడ్డున నిలబడి
ఆ వొడ్డులోంచి కొన్ని సందేహాలతోనో,కొన్ని సంకేతాలతోనో
విస్తరిస్తూ వుంటాం అలా అందర్లోకి
కొందరు పసిగడతారు; గుర్తుపడతారు
ఆ చిన్నప్పటి ముఖాన్ని -వారే ,వాళ్ళే
కొన్ని కన్నీటిచుక్కల్తో ఆత్మీయంగా పలకరిస్తారు,హత్తుకుంటారు
మిగతా అందరూ ఆ పై పై ముఖాలదగ్గరే ఆగిపోయి
ఉండిపోతారు
*
లెక్కలేసుకోవాలి ఎప్పుడో ఒకప్పుడు అసలు ముఖంతో !
ఆయా ముఖాల దగ్గర
ఎందరు నిలబడివున్నారోనని ; ఎందరు నిష్క్రమించారో అని
18.11.2013
No comments:
Post a Comment