బహు'ముఖీ'నం

.....................

పూలను రాల్చే చెట్లలాంటి ముఖాలు
ఇసుకతుఫాను కప్పేసిన ఎడారి ముఖాలు
తుపాకుల్లాంటి ముఖాలు
నిదురను తలపించే అశాంతి ముఖాలు

ముఖాల మీది ముఖాలు
లోపలి ముఖాలు

బూజువేలాడే ముఖాలు

క్రౌర్యం మొలిచిన కళ్ళలోంచి
ముళ్ళను ప్రదర్శించే ముఖాలు

మ్రుత్యుశయ్యలాంటి ముఖాలు;
రంగులకు రంగులద్దే ముఖాలు
------దాగివుండే ముఖాలలోని ముఖాలు

తెరచాపలు కట్టుకుని ప్రశాంతంగా సాగిపోయే నావల్లాంటి ముఖాలు, అలల తాకిడికి ఆదమరిచి నిద్రించే ప్రశాంత తీరాల్లాంటి ముఖాలు,ఇంద్రధనుస్సుల్లా ఆకాశాన్ని ముద్దాడే ముఖాలు, స్వేచ్చగా విహరించే ముఖాలు, ముఖాలలోని లోలోని పసిముఖాలు

నిరంతరం
వెంటాడే ముఖాలు బహుముఖీనాలు