చల్తే రహో !

...........................

ఇంకొన్నిసార్లు ఇలాగే నడవాలి
ఎప్పట్లాగే నడుస్తూ నడుస్తూ ఉండాలి దారెలాగో తెలుస్తుంది అదే

నిన్నే చూసి నువ్వే నేర్చుకోవాలి
నీ మీదే నీకు నమ్మకం ఉండాలి

ముసుగులెందుకు,మునగదీసుకుపోవడాలెందుకు
నీ ముఖం నీకే దివిటీలా కన్పించాలి
చూపుల్లో భాష చురుకుగా ఉండాలి
మాటల్లో బతుకు మెరుపులా మెరవాలి

నంగితనాలొద్దు,నజరానలొద్దు,మొహమాటాలూ వద్దు
వద్దంటే వద్దు,అసలే వొద్దు
పడిలేచిన కెరటంలా కసిగా ఉండాలి ,కసిదీరా జీవించే
కాంక్షలా ఉండాలి
నిద్రించే ఊహలమీద నెగడ్లు పెట్టు
నిన్ను నువ్వు డప్పులా ఎగిసే నిప్పుసెగలమీద కాచుకో
కణకణమని మోగాలి
నువ్వో అక్షరం,నేనో గుణింతంలా కాక
రెపరెపలాడే పుస్తకంలా ఉండాలి.

మాటో,మంత్రమో,చిచ్చుకొట్టే సందేశమో,అప్పటికప్పుడు రెడీమేడ్ గా
చిలకరించే ప్రేమో -అసలే పట్టించుకోకు,దేన్నీ ఖాతరు చేయకు!
నువ్వు నువ్వే
నువ్వే నువ్వు
చల్తే రహో, చలో చలే -