ఇప్పటి ప్రవాసం

.................................

ఇంకెప్పటికీ వినకుండా ,కనపడకుండా
తప్పిపోయిన మాటలోంచి, నిన్నటిలోంచి, నీలోంచి, చట్రాల్లోంచి 
కాస్తంత కనుమరుగుగా అటూ ఇటూ కదలాలి

నిజానికి- అపజయం ఎంతటి విజయం !
నువ్వలా మండటం ఆగిపోయాక
నిన్నో మబ్బు కొంతసేపు సేదతీరుస్తుంది.
మబ్బుల్లోకి దూరి ఆ కూసింతసేపు విశ్రమించడం ఎంతటి అపురూప అనుభవం !

తెల్లారాక
కళ్ళముందు పుసిలా రాలుతున్న చూపుల్ని కడిగినట్లు
కడగగలిగామా ఈ లోకాన్ని.
బండరాయిలా అడుగుల్ని అడ్డుకుంటున్న రోజుల్ని
చితికిన బొటనవేళ్ళ గాయాల రక్తంతో
దాహం తీరుస్తూనే మునుముందుకు సాగిపోతున్నాం కదూ !

అరిగిపోయిన మాటల్నేవింటూ, అవే ఆవేశాల్ని
రోజంతా తింటూ అంతా ఒక కొలిక్కివచ్చేదాక
నిన్నటి వ్యూహాల్నే పత్రికల్లోకి,మీడియా గొట్టాల్లోకి వొంపడం చూస్తూ
సర్లే ! ఏం ఫర్వాలేదు. ఇప్పటికిలా ఒక బంద్ నో, ఒక రాస్తారోకోనో ,ఒక ధర్నానో
ఇవాళ కూడా అందరిమీదకు వలలా విసిరేద్దాం .
చిక్కుకుపోయాక కదా తెలిసేది చిక్కుల అసలు రహస్యం !

ఒకప్పటి ఆత్మన్యూనతంతా ఇప్పటి అసలు స్వరూపంగా
వెలికివస్తుంటుంది పదే పదే!
అదే నిజం; ముమ్మాటికి నిజం అదే !

22.1.2014