వర్తమాన గతం

...............................

ఎవరైనా ఇంకేం చేయగలరు?
కొన్ని పొడి పొడి సుఖాల్లోకి,దు:ఖాల్లోకి వొంపుకుని 
పొట్లాలుగా కిరాణాకొట్లలోంచి తెచ్చుకునే వస్తువుల్లా
తమని తాము
ఇంటికి తెచ్చుకోవడం తప్ప.

కొన్నిచోట్ల నిన్ను నువ్వే కొంతమంది మధ్యలో చూసుకుని
ఆరోజుకి అలా తృప్తిపడిపోతుంటావు కానీ, చివరికిలా
మిగిలేది నీకు నువ్వే !
నిన్ను నువ్వే వెంటాడుతూ,వెంటవస్తున్న జ్ఞాపకాల్లోకి
వెళ్తూ వస్తూ
కొద్ది
కొద్దిగా ఆరోజునలా జీవిస్తూ ఉంటావు.

ఇంకొద్దిగా కల; ఇంకొన్ని జ్ఞాపకాలు

వాగులో ఊట మాత్రమే మిగిల్చిన తడి ;ఎండిపోయాక
ప్రవాహం కలవరించే నీళ్ళ చప్పుడు.
రాలిపోయాక కాళ్ళకింద గరగరలాడుతూ ఆకులు చేస్తున్న
చప్పుడులో పత్రహరితపు కన్నీళ్ళ చప్పుడు .

జీవించడమే వర్తమాన గతం
కొన్నేళ్ళుగా సాగిస్తున్న ప్రయాణపు కొలమానం జీవించడం

ఎవరైనా ఇంకేం చేయగలరు?
కొంత తడి, ఇంకొంత పత్రహరితం గురించి
మాట్లాడటం తప్ప.

27.1.2014