ఒక సంభాషణ ముగిశాక,మరో సంభాషణ

****

నువ్వెప్పుడైనా నీ సంభాషణలో నువ్వే పరాయిగా మిగలడం
ఆ పిదప
నీ మాటల్లోనే నువ్వు మునిగితేలుతుండటం
గమనించావా?

లేక, నువ్వే నీవి కాని మాటలతో
అప్పటిదాకా గడపటం-అలానే ఇంకా గడిపేస్తుండటం
గమనించావా?

నిన్నటిదాకా నీకు నువ్వే వేసుకున్న దారుల్లో
నీ అడుగుల్నినువ్వే లెక్కించుకుంటూ
ఆ దారుల్లోనే మళ్ళీ మళ్ళీ
నడుస్తూ తడుస్తూ ఆ సంగతులే పదేపదే చెపుతూ
అక్కడే మిగిలిపోయావని గమనించావా?

మనుషుల్నిముడిసరుకులుగా మార్చే
వ్యాపార సంస్క్రుతి లోకి,అంకెలుగా మార్చే వ్యూహాల్లోకి
నువ్వూ, నీ అక్షరమూ చేరిపోతున్నాయని
గమనించావా?

గమనించీ ఎవరూ గమనించడం లేదనే
ధైర్యంతో అలా
ఉండిపోయావా?!