యూ టర్న్

నేనే అని చెప్పుకుంటావు,
కానీ నీకోసం నీవేమీ కాలేవు...
పాతసామానుల పెట్టెలాంటి
దేహం లోపలెక్కడో కొంత మిగిలిపోవడం తప్ప!

గెలవడం కోసం కాక
గెలిపించడం కోసం ఏళ్ల పయనం తర్వాత,
జమా లెక్కల కొసన కన్పించీ కన్పించని ఒక గీతలా
అలా ఉండిపోతావేమో!

ఇరుకిరుకు సందుల్లోంచి మొదలై,
నడిచి నడిచీ మళ్ళీ అక్కడికే చేరుకున్నట్లు
అక్కడే సంచరిస్తుంటావు సదా!

ఏ దోవ ఎటు పోతుందో తెలియక,
వెతుకులాటల్లో వెదుక్కోవడమే జీవితమయ్యాక,
అడుగుల కింది ధూళి అనుభవంగా మారాక,
కంటి రెప్పలలోనే కన్నీళ్ళన్నీ మలిగాక -
నేనే అని చెప్పుకుంటావు...
కానీ, నీకోసం నీవేమీ కాలేవు!

---