ఏదో మిగిలే ఉంది !

లోపల ఇంకా ఏదో మిగిలే ఉంది.స్థిరంగా ఉంది.తడిగా ఉంది.రక్తమంటి జిగట జిగటగా ఉంది.
చేతికి అంటిన అన్నంమెతుకుల ఎంగిలిలా ఉంది.కడిగిన చేతివేళ్ళ మధ్య దాగిన కారపుమరకలా ఉంది.

ఏదో మిగిలే ఉంది.

ఒంటరిగా వొంటరి ఒంటరివై వొంటరి 
వొంటరితనంతో కసిగా రక్కేస్తున్న -ఒంటరి.

నిజమో కాదో తెలియక ,మిగిలిందే చివరిదని,చివరికి మిగిలిందేనని
నమ్ముతూ రోజుల్ని అమ్ముతూ పగళ్ళూ రాత్రుళ్ళూపొర్లుతూ దొర్లుతూ
ఎంతో మిగిలిపోతూ, మిగిలినదేదో తెలియని
ఏదో మిగిలే ఉంది.

లోపల దాచిన అసలు రహాస్యమే నువ్వు
బయటికి కన్పిస్తున్నది అసలు నువ్వేకాదు.

అసలు ఏం చెబుతావో
మాటలేవీ మాటలే కావు.
ముఖం దాచుకోవాల్సిరావడం
ముఖంపై నిజాల్ని తొడుక్కోలేకపోవడం ఇవాల్టి పదచిత్రం.

నిజమేనేమో- ఇలా తవ్విపోస్తున్నది ఈ మెట్రో రైలు గుంతలని కానేకాదు
నగరం నడిబొడ్డు మీద నిన్నే నిన్నే నిన్నే....!!

#15.8.2013