కవిత్వంతో మాటా ముచ్చట !

 
................................................

నిన్ను కలిసాకే
నా మనో ఉద్యానవనంలో పూలు పూచాయి
అక్షరాల కలువలు విప్పారాయి
దారినిండా పసుపుపూల ప్రేమ గీతాల దొంతర

నీ జ్ఞాపకాల తెమ్మెర తాకగానే
దేహం జీవనకాంక్షలా మారి
కొత్తకాంతుల్ని వెదజల్లుతుంది

ఏ జన్మల అనుబంధమో
నీ సమక్షంలో తల్లిని చేరిన బిడ్డలా
ఉప్పొంగుతాను
నీ నిమిరే చేతుల మధ్య
ఆత్మవిశ్వాసంలా ఇమిడిపోతాను

నా నుంచి నువ్వు దృష్టి మరల్చినప్పుడల్లా
అలిగి భూమిమీద ఏడుపు గొంతుతో పొర్లాడుతాను
నా అలసటల్లో సేదతీర్చే నీ ఊహ
అమృతబిందువుకన్నా శ్రేష్టం!
సతతం నాలోని చెట్టు చిగురింతకు
పత్రహరితాన్ని అద్దే ప్రకృతి నువ్వు-
’నీ కోసం నేనున్నాను’ అనే మాటల్ని
పదే పదే వల్లెవేసుకుంటూ
ఊరటపడుతుంటాను
1
"ఏదైనా మాట్లాడు"
"మాట్లాడుతోనే ఉన్నాను, వినిపించడం లేదా?
నాలోంచి నిరంతరంగా నీలోకి ప్రవహించే సారాన్ని ఒడిసి పట్టుకో"
"ఇంకాస్త మాట్లాడు"
"ఎన్ని ప్రతీకల్ని, ఎన్ని సంకేతాల్ని, ఎన్ని దృశ్యాల్ని
నీకోసం పంపుతున్నానో"
"అందడంలేదు"
'ఒడిసిపట్టుకో-జీవించు, అన్నీ అందుతాయి
మనసునంతా తెరిచి ఉంచు"
2
మధనపడుతున్నాను, మనోనేత్రం తెరిచివుంచాను
అందుకుంటున్నాను, చేజార్చుకుంటున్నాను
తెగిపోతూ మళ్లీ అతుక్కుంటున్నాను; ఎక్కడో జారిపోతున్నాను
చిగురిస్తున్నాను, మళ్లీ ఎండిపోతున్నాను
మళ్లీ జన్మిస్తాను సరికొత్తగా-
కొత్తగా నీలోకి నన్ను ఒంపుకోవడానికి అక్షరం లా పుడతాను
3
"నావైపు చూడు"
"ఇప్పుడే కళ్ళు తెరిచాను నిన్నెలా గుర్తుపట్టడం"
"అలా పరిగెత్తుతున్న మబ్బు; కిక్కిరిసిన రోడ్లు, విరిగిపోతున్న కాలం;
కాలుతున్న ఎడారులు; రాలుతున్న పూలు; కూలుతున్న మనిషి;
ఉరితీతకు ఎదురుచూస్తూ ఇనుపచువ్వల వెనుక
మార్మోగుతున్న పాట; నినదిస్తున్న గొంతు; నిద్రిస్తున్న, నటిస్తున్న రాజ్యం; ఓట్లలోకి బట్వాడా అవుతున్న ఖనిజం; లేచి పడుతున్న,
పడిలేస్తున్న ఉద్యమం; రూపమ్ మార్చుకుంటున్న మిత్ర శత్రువు;
మిణుకుమిణుకు మంటున్న ఆశ; దగ్ధమవుతున్న భవిష్యత్తు-
చూస్తూనే వుండు"

"ఇన్నిసంక్షోభాల మధ్య
నన్ను నేను సంభాఌంచుకుని, సమీకరించుకునే
గొంతు సవరింపువి నువ్వే!
నువ్వే నా మాటవి, వ్యక్తీకరణవి, మనుగడవి
అక్కున చేర్చుకునే మనిషివి!"

--'పాలపిట్ట' జనవరి 2012