అపుడపుడూ ఎక్కడికైనా వెళ్లి రావడానికి ఒక చోటుండాలి,ఊరుండాలి,కనీసం ఒక్క మనిషైనా మిగిలుండాలి !

13 Nov 2012

బహు'ముఖీ'నం


.....................

పూలను రాల్చే చెట్లలాంటి ముఖాలు
ఇసుకతుఫాను కప్పేసిన ఎడారి ముఖాలు
తుపాకుల్లాంటి ముఖాలు
నిదురను తలపించే అశాంతి ముఖాలు

ముఖాల మీది ముఖాలు
లోపలి ముఖాలు
బూజువేలాడే ముఖాలు

క్రౌర్యం మొలిచిన కళ్ళలోంచి
ముళ్ళను ప్రదర్శించే ముఖాలు

మ్రుత్యుశయ్యలాంటి ముఖాలు;
రంగులకు రంగులద్దే ముఖాలు
------దాగివుండే ముఖాలలోని ముఖాలు

తెరచాపలు కట్టుకుని ప్రశాంతంగా సాగిపోయే నావల్లాంటి ముఖాలు, అలల తాకిడికి ఆదమరిచి నిద్రించే ప్రశాంత తీరాల్లాంటి ముఖాలు,ఇంద్రధనుస్సుల్లా ఆకాశాన్ని ముద్దాడే ముఖాలు, స్వేచ్చగా విహరించే ముఖాలు, ముఖాలలోని లోలోని పసిముఖాలు

నిరంతరం
వెంటాడే ముఖాలు బహుముఖీనాలు

1 Nov 2012

పాఠం


........................

తీగెలు తెగాలి ;
కలవనంత కలపనంత దూరం నిలబడి
నిశ్హబ్దాన్ని వాహికగా మలుచుకుని బతికేయాలి

చీకటి కమ్ముకోవాలి ;
వెలుగేమిటో కాంతి ఏమిటో కళ్ళముందు మెరిసేట్లు కదలాలి
అంతా అనుకున్నట్లు జరిగిపోవడం
బోలెడంత బోర్

అడ్డు ఏమిటో, ఆటంకాలేమిటో అర్ధమవ్వాలి

సంతోషాలే నిజమైన జీవితం కానేకాదు
అంచుకు నంజుకునే చింతతొక్కులా చింత పక్కనే ఉండాలి
వంతనల మధ్య రాటుదేలి
మిగిలిన జీవితంతో కలుపుగోలుగా కలిసిపోవాలి

అంతే మరి ?!


31.10.2010

ఇటు కూడా ఓ లుక్కేయండి

Related Posts Plugin for WordPress, Blogger...